Merkelapp-arkiv: hurtigruten

Meditasjonsfjernsyn

Share

Eg har blitt sitjande framom TV det meste av kvelden og store deler av dagen. Meditasjonsfjernsyn kalla Berit Rekve programmet Hurtigruten minutt for minutt som går på NRK 2 desse dagane, og er opplever det på same måten. Eg har reist norskekysten frå Stavanger til Kirkenes, og her får eg gjenoppleve både kysten og havnene. I kveld var det Hurtigrutens Dag i Rørvik og 2000 på kaia i den lille kystbyen der det bur 2700. 130 båtar med kanskje tusen menneske i båtane og; eit yrande liv. Så starta Helgelandsferda.

Ein himmel i dei finaste fargar, midnattsol og nesten blankt hav. Så lokkar dei med Torghatten, ekstra runde ut for å sjå holet i fjellet denne fine sommarkvelden. Ikkje rart om folk ikkje klarar å rive seg laus. Og på ferda inn til Brønnøysund er det igjen ei rekke båtar ute for å fylgje Hurtigruta inn mot hamna.

Då vi budde på Stokmarknes, var Hurtigruta viktig for oss. Sørgåande gjekk rundt klokka fire om ettermiddagen og møtte nordgåande i Svolvær, så vi kunne ta gjester med på tur gjennom Raftsundet, anten på nordtur eller sørtur eller begge deler. Og vi nytta båten når vi skulle til Bodø eller heim att, fly gjekk fortare, men Hurtigruta var ei oppleving.

Eg les på kommentarfeeden at det er mange som set pris på programmet på NRK2, nokre lurer på kva som gjer at dei gløymer å sjå på program dei hadde tenkt å sjå på. Thor Bjarne Bore twitra med eit Bjørnson-sitat: Som Bjørnson ville sagt det: Kjør langsomt, thi vi kommer tidsnok frem. Og sjølv om dei er forsinka til Brønnøysund, så langt eg kunne sjå på eit bilete frå eit kamera med telelinse var det mykje folk ute og venta på båten, sjølv om klokka er eitt før båten er inne. Det stod fullt av folk på brua utanfor byen.

At folk vil få lyst til å reise på cruise med Hurtigruten etter dette programmet, det trur eg nok. Reklame for det vakre landet vårt er det etter mi meining. Så kan ein minnast opplevingar og reiser ein sjølv har hatt.

Ulike reiser

Share

I kveld skriv eg med suset frå Hurtigruta i øyrene. Du trur vel at eg er på tur, men eg sit i Valle som eg pleier. Grunnen til suset er at på NRK2 sender dei programmet Hurtigruta minutt for minutt, verdas lengste TV-program. Det starta i kveld, og skal gå i 5,5 døgn. Det er ei oppleving å sjå det, og etter det eg ser på twitter og Facebook, er eg ikkje aleine om å sjå på det heller. Alt no, bare få timer etter at dei starta, har dei passert store cruiseskip og små kyst-tankbåtar, og naturen er fascinerande.

I dag fekk eg overraskande besøk av bror min og kona. Dei var på veg frå Ålgård til Oslo og tok indre vegen, ettersom Suleskarvegen er open no. Det var veldig hyggeleg at dei stoppa her ein time, og vi fekk ein god prat. Dei var på biltur, og tenkte at det var godt å strekke på føtene i Valle. På Hurtigruta kan ein strekke føtene kva tid ein vil, så det er jo to ulike reiser og heilt ulike opplevingar.

Å køyre over heia til Sirdal er jo ei oppleving i seg sjølv. Eg møtte Gunlaug Tveiten på biblioteket i dag, ho hadde vore med på turen som Fagforeninga hadde for dei tilsette i pleie og omsorg til Flor og Fjære i går. Ho sa akkurat det, å køyre over heia er ei oppleving. Å kome til parkanlegget i Ryfylke er ei heilt anna oppleving, det blømer i kvar krik og krok.

Eg nytta forresten høvet til å skrive om Gunlaug på Setesdalswiki. Det vart ein innhaldsrik liten tekst, du kan lese den her: http://www.setesdalswiki.no/wiki/Gunlaug_Tveiten Ho er hjelpepleiar og aktivitør. Det høvde forresten slik at eg og skreiv om ein annan hjelpepleiar og aktivitør i dag, Anne Helle Hagen. http://www.setesdalswiki.no/wiki/Anne_Helle_Hagen Utanom jobben spelar ho religiøse folketonar på hardingfele, og Tone Å. Rysstad syng, så dei reiser til aldersheimar og kyrkjer og framfører musikk.

Ulike reiser, ulike opplevingar. Den som reiser, har noko å fortelje, vert det sagt. Å høyre folk som har vore på reise, fortelje i Valle Radio, gjev ofte interessante radioprogram. Kanskje du skal ut på ei reise i sommar og har noko å fortelje om i Valle Radio til hausten. Tenk på det og gje meg eit ord om du har lyst til å fortelje om ei reise du har gjort.