Gratulerer med dagen

Share
Reidun får bilete, Lisbeth får orda på bloggen i kveld.

I morgon fyller kona mi 70 år. Reidun Haugland og Lisbeth Dalquist Homme har same dagen. Gratulasjonar til Reidun kan eg ta munnleg, til Lisbeth sende eg dei gjennom Setesdølen i dag, og den artikkelen legg eg ut her i kveld:

I morgon, fredag 12 mai, fyller Lisbeth på biblioteket i Valle 70 år. Ja, for sjølv om det no er snart to år sidan ho vart pensjonist, vert ho framleis kalla Lisbeth på biblioteket. Det er ikkje så rart, ho begynte der i 1975 etter først å ha jobba på bibliotek i Oslo etter utdannninga. Men i Oslo møtte ho Knut K. Homme, dei gifta seg i 1973 og året etter kom dei til Valle. 

Gjennom åra har Lisbeth Dalquist Homme formidla litteratur til store og små i Valle. Ho arrangerte lesesirklar for vaksne og bamsekveldar for ungar, pendla mellom Valle og Rysstad og fann bøker til store og små som kom innom biblioteket, anten det var i soknehuset på Rysstad medan ungane var på leikarring, eller i det heilt sentrale nybygget som biblioteket no ligg i der. I Valle bar ho bøker opp og ned trappene i det gamle heradshuset, nokre gonger for å bytte mellom samlinga på Rysstad og i Valle, andre gonger for å bringe litteratur til bygdeheimen. 
Men Lisbeth Dalquist Homme engasjerte seg også i det lokale kulturlivet. Ho vart med i Valle Bygdekvinnelag, der var ho også leiar i ein periode. Ho var studieleiar for Bygdefolkets Studieforbund og organiserte kurs av mange slag opp gjennom åra. Trondheimspia var også leiar i Valle Mållag eit par periodar, sterkt engasjert i arbeidet for nynorsk litteratur. -Eg les det meste, brukar ho å seie, men ikkje krim, om det ikkje er ein forfattar frå Trondheim som skriv på nynorsk, då. Og då var det bare ein forfattar, Idar Lind, som passerte nålauga. 
Ho vart også med i Valle jordbruksklubb, ei forening for hagebruk, kan hende snart den sist i sitt slag i landet. Årleg konkurrerer medlemmene om beste resultat i hagebruk, og Lisbeth sin hage i Innistog Homme kom høgt på på premielistene.Med ein slik bakgrunn var det også naturleg å vere vaksenleiar i 4H. Som om ikkje dette var nok fann ho også tid til å spele i Valle og Hylestad musikkorps så lenge det var i drift. 
Som pensjonist har ho teke vare på gleda ved å reise. Men ho er framleis aktiv lokalt, i år også som 17. mai-talar i Valle. Alle vi som har hatt glede av Lisbeth Dalquist Homme sin store innsats i Valle gjennom åra, ønskjer henne til lukke med dagen og dagar som kjem.