Dagsarkiv: 16. desember 2019

Ymse

Noko forunderleg skal skje

Legg att eit innspel
Share

Eg har mange gonger lurt på korleis det kan ha seg at nokre som skriv blogg, kan ha tusenvis av besøk på bloggen. Før hadde eg på det meste 4-500. Eg har blogga i over ti år og andre får tusenvis av lesarar på bare eit halvår og mindre enn det.

I dag var eg innom og såg på statistikken og såg til mi undring at det hadde vore over 10.000 besøk og nesten 30.000 sidevisningar bare i helga. Så vidt eg veit har eg ikkje gjort noko spesielt for å få så mange besøk.

Men i torsdagsutgåva av Setesdølen hadde eg ein liten artikkel om Setesdalswiki. Det var Knut Eldhuset som oppfordra meg til å skrive at ein kan lese artiklar som far hans skreiv i Fædrelandsvennen på Setesdalswiki. Kan hende er det dette som har gitt så stor respons.

Her er artikkelen:

Det siste året har Setesdalswiki fått ei rekke artiklar som Hallvard Eldhuset (1914-1976) skreiv for Fædrelandsvennen og Jol i Setesdal. Hallvard Eldhuset var lærar og skulesjef i Bygland og svært interessert i lokalhistorie. Difor skreiv han mange artiklar om det som vert kalla slitet si soge i Åraksbø. Han skreiv også andaktane i Setesdølen då den kom ut, og hadde han fått leve lenger,  ville det sikkert kome mange artiklar i Setesdølen frå hans hand.

Sonen Knut Eldhuset er forskar og bur i Nittedal. Når han ikkje er oppteken med matematikk og fysikke, har han funne fram dei gamle artiklane til faren og lagt dei til rette for Setesdalswiki. Han seier at ved å leggje dei ut på Setesdalswiki, kan han llegge ut kart og biletstoff som syner kor det faren fortel om, gjekk føre seg. I tillegg gjev Setesdalswiki høve til å lage lenker, slik at folk kan klikke seg inn på dei og få meir informasjon. I tillegg har Knut Eldhuset skrive innleiing – han kallar det supplement – til artiklane, der han legg til opplysningar frå nyare tid.
Dei fleste artiklane til no er frå 1971, der Hallvard til dømes fortel om Då Kjetil Borgi sat fast som fugl i ei snare eller Då ungguten Knut omkom under høykøyring på heia.
Til no har det kome åtte artiklar, og Knut Eldhuset har meir på lager. Difor vil eg oppmode lesarar av Setesdølen til å kikke innom på Setesdalswiki og lese dei svært interessante lokalhistoriske artiklane.
Fil:Jan O Knut Eldhuset.jpg
Teikning av Jan O. Henriksen i Fædrelandsvennen (1971) der Knut Eldhuset kjempar mot høylasset.