Oversyn over hausten

Share

I morgon skriv vi 1. oktober og komande onsdag er det min tur til å ha sending i Valle Radio. Eg burde nok helst slutte med det, sjølv om teknikken gjer det mogleg og Setesdølen gir meg informasjon om ting som hender i Setesdal, er eg jo meir på avstand frå livet i dei indre bygdene når eg held til her i Mandal.

Men enn så lenge er eg med, i haust blir det tre sendingar på meg etter den oppsette planen, så eg får prøve å følgje med så godt eg kan. Kvart halvår lagar Ørnulf ei liste over kven som skal ha oppgåver i radioen og sender den ut til oss. I kveld fekk eg endeleg lagt den ut på Setesdalswiki, så no kan du gå inn der og sjå kven du skal kontakte om det er noko du vil ha med i radioen.

Berit Henriksen i Folkeakademiet er flink til å tipse oss om folk dei får på besøk. Ofte blir det då innslag i Valle Radio med dei. Publikum blir vonleg ikkje mindre med slik førehandsomtale. Til onsdag har eg fått med meg Gro Anita Homme, ho skal ha eit innslag i Kulturveka 2022, og då kan det vere interessant å snakke litt på førehand.

Elles blir det ofte at ein finn noko interessant i avisa og spinn vidare på det. Slik blir det nok for meg denne gongen også. Men det får vi kome tilbake til.

Legg att eit svar

Epostadressa di blir ikkje synleg.