Advent

Share

Så er 1. søndag i advent over. Det var flott å få med seg litt av Salmeboka sine adventssalmer då NRK brukte 40 minutt på reprise av dette programmet i kveld.

Tirsdag har eg ein plan om å dele nokre fleire adventsalmer med deg i Valle Radio. Eg er sett opp frå 18.40 til 19.30, det blir 50 minutt. Då vil eg starte med

Stockholm Singers som syng Advent av Otto Olsson. 4 minutt

og Hosianna, Davids son 2:44 minutt

Så syng Børre Knudsen Fryd deg storlig, Sions datter 3:31

Julemotett av Eyvind Alnæs med Fredrikstad Doms Jentekor 4:00

I’m dreaming of a white Christmas Jim Reeves 3:13

Folkefrelsar til oss kom Kristin Reitan 4:10

Hvorledes skal jeg møde The vanishing quartet 2:19

Til Betlehem i Judaland Kvedarkvintetten 5:00

Jeg løfter opp til Gud min sang Alta motettkor 3:07

Må vi få ei fin adventstid.

Slekt og slikt

Share

Helge var aktiv med slektsgransking. No har Margunn overteke den rolla, og i kveld har ho ført inn mange namn i databasen hans. Den er ganske stor, for han hadde mange greiner på slektstreet. Ofte fekk dei nye greiner, av og til kunne programmet generere og finne felles slekt om ein gjekk langt nok bakover i tid og så framover att. Slikt ville vore vanskeleg utan datahjelp.

I formiddag var dei på Buen her i Mandal for å sjå på utstillinga som Bodil Nilsen Hodne og Anne Noddeland har. Bodil stiller ut tekstilkunst og Anne har fotografi. Reidun arbeidde saman med Bodil på Mandal sykehjem før ho vart pensjonist. Då dei kom heim og eg fekk sjå katalogen, var det mange verk eg kunne tenkt å ha på veggen. Men våre vegger er ganske fulle, i motsetning til mange vegger i moderne hus, der det knapt heng noko på veggene.

 

God hjelp

Share

Gud såg at mannen ikkje kunne klare seg aleine, difor skapte han ei kvinne som kunne hjelpe han, heiter det i Bibelen si skapingssoge. Det er godt med gode hjelparar, og i kveld fekk vi besøk av Margunn og Stein. Dei hjelper mellom anna med å rydde ut av leiligheten til Helge, og der var det mykje, sjølv om den ikkje var så stor.

Mellom anna hadde han samla mange CD-plater, han var glad i musikk. Platene har informasjon om artistar og komponistar og tekstforfattarar. Slik informasjon finn ein ofte bare i samband med den fysiske plata. No arvar vi dette, vonleg kan det kome til nytte for Valle Radio om eg skal lage eit musikkprogram ein gong.

Til veka har eg sagt ja til å lage eit program med adventsmusikk saman med Siri på tysdagskvelden. Kan hende kan eg vere til hjelp for henne, ho lagar så mange fine program i radioen, finn interessante folk å snakke med og musikk som høver til.

Denne veka har eg lese Kniven i ilden av Ingeborg Arvola. Ho skriv om ei sterk kvinne som hjelper mange rundt seg. Den boka skal eg levere inn i morgon, slik at andre får lese den, ho er på 14 dagars lån.

Plunder og krøll

Share

I kveld vart det litt meir plunder og krøll enn vanleg. Eg hadde ansvaret for sendinga i Valle Radio og starten vart noko prega av at vi ikkje fekk logge på Internett slik vi skal. Eg veit ikkje kva det var som var problemet, men Jørund Georg Jore kom Torfinn Brokke til unnsetning.

Så etter kvart kom Torleif Harstad på lufta med Tankar frå Bibelen. Men den vart avstytta, og Ann Christin Jacob hadde gløymt at ho hadde ansvaret for Kommunen informerer. Dermed måtte eg klare meg sjølv ved hjelp av Setesdølen. Det var eg jo ikkje heilt førebudd på, men heldigvis låg avisene her ved stolen i Mandal, så litt fekk eg jo sagt.

Eg skulle ha med meg folk i Aktuell time, men hadde gløymt å sende telefonnummera til Hans Fredrik Grøvan og Sigbjørn Åge Fossdal slik at Torfinn kunne ringe til dei. Han fekk dei etter kvart og dei snakka om Nasjonale turistvegar og arbeidet for å få vegen frå Evje til Hovden i ein slik kategori. Det er den strekninga som er spesiell, starten i byen kan ikkje kome i ein slik kategori. Det er Regionrådet som jobbar med dette, og Grøvan har hjelpt i kontakt inn mot sentrale etatar.

Lisa Blom skal ha foredrag på Setesdalsmuseet 3. desember, så vi hadde ein prat for å promotere «I ei kiste, på eit loft». Henne kunne eg snakka lenge med, for ho hadde mykje å fortelje. Dei som tek turen til museet, vil få både historie og historier.

Eg hadde planlagt at folk skulle høyre julesangar og kjenne att teksten, men Jorunn Lund Harstad kom meg til hjelp med normale rebusar og vi hadde hyggelege samtalar med folk frå Sauda, Siljan, Frogner, Bykle og Bygland.

Gode kveldar

Share

Å kome saman og snakke etter ei vond hending, det er god terapi. I så måte er det godt å ha familie som ikkje er i tottane på kvarandre.

I kveld kom Jorunn og Ole Thorvald Moen frå Lyngdal for å ta ein kaffekopp saman med oss. Jorunn og Reidun har alltid noko strikke-aktuelt å snakke om, så dei finn tonen lett. Vi mannfolka kan delta i samtalen på eit enklare nivå, men så har vi heldigvis også anna å snakke om.

Dei er aktive på ein annan måte enn oss, for dei har planar om både å reise til Dresden og til Trøndelag før jul. Juleutstilling i Dresden og barn og barnebarn i Trøndelag, det er mange inntrykk å få med seg i julemånaden. I kveld har snøen tint, så det var greitt å kjøre, men eg lurer litt på om dei fekk problem på turen heim, for det hadde visst vore uhell på vegen mellom Mandal og Lyngdal.

Om vi ikkje hadde fått besøk, hadde eg nok høyrt på Valle Radio. Etter sendinga snakka eg med Siri Johannessen, som hadde tysdagssending som vanleg. Ho hadde alt fått positive reaksjonar på programmet, så det hadde vore ein god kveld i radioen også.

Og så kom det ein telefon frå Solvor på Varhaug. Ho tenkte på oss i denne førjulstida. Så det var ein god kveld.

I morgon skal eg ha ansvar i Valle Radio. Programmet kom ikkje i avisa, men det held på å ordne seg, så eg trur det blir bra nå dei siste avtalane fell på plass.

Eg forsat meg

Share

I dag forsat eg meg. Eg skulle sendt program til avisa for onsdagskvelden, men det var skrive i gløymeboka, så eg hadde ikkje noko å sende innan fristen. Factum est, for å seie det på latin, eg hadde ikkje noko planlagt i det heile. Siri minna meg på at vi hadde bytta slik at eg slapp å ha sending like etter Helge si gravferd.

Eg vil ta kontakt med aktuelle folk i morgon og reknar med å få det på plass då. Siri har programmet sitt klart no i kveld, her er det:

Tirsdag 22. november
Ansvarlig og tekniker: Siri Johannessen
Program
18.00 Kvarteret med kåseri av Asbjørn Kvalbein
18.15 Over en åpen bibel med Tone Benestad fra Norea
18.30 Sangmøte fra Setesdalens Jolemesse med Espen Ottosen og FriHals
19.30 Timen med Setesdalsmuseet om kommende helg på Rysstad, juleforberedelser, fakkeltog og konsert
Forsker Rune Slimestad som forsker på antioksidanter
Else “Sprossa” Rønnevig om bevaring av bygg og miljøer
20.30 Postludium med de siste seks delene av Sigurd Islandsmoens rekviem, med Det norske solistkor og Kristiansand symfoniorkester
21.00 Kyrkjebakken

Årbøker

Share

Årbøker kan ha mykje variert og interessant informasjon. Son min, Sigmund, hadde ein artikkel i Årbok for Sunnmøre 2013. Han skreiv om nettstaden sunnmiddelalder.net, som han laga i samband med studier i historie.

Boka har dukka opp frå ein eller annan plass, og eg sat og bladde litt i den i kveld. Kan hende det var fordi eg måtte roe meg ned etter den spennande handballkampen mot Danmark. Om eg får energi, skal eg lage artiklar om forfattarane på Setesdalswiki med tid og stunder.

Eg fann at boka har mange varierte artiklar. Her er lista:

God samtale

Share

Eg hadde hatt ein pause og kom inn att i stova, og der sat Reidun si kusine Freydis Stensrud. Ho held til på Soltoppen, like i sjøkanten ved Skogsøy utanfor Tregde. Ho hadde med blom, ein lilla orkide, det er jo snart advent, så det høvde godt.

Samtalen gjekk om både før og no, eg har ikkje føresetnad for å henge med i alle svingane, for mangt skjedde før eg kom inn i bildet her på Eskeland. Ho blei med til lunsj, ho mista mannen for eit par år sidan, og det er ikkje gildt å ete aleine.

Freydis har vore glad i å reise, huset hennar er fullt av minner frå reiser til både Afrika og Asia, så ho kunne godt forstå at Kristine valde å gå på gymnas i Eswatini. No har ho og familien vore saman i Afrika ei veke og er komne til Cape Town der dei skal ha ei veke før dei vender heimover.

På TV melde dei at det vil bli snø i helga, kan hende opp til 15 cm. Reidun fekk vinterhjul på bilen i går, så ho er klar til å lage kyrkjekaffe i Mandal kirke i morgon også om det blir vinterføre.

Julemesse

Share

I dag var det julemesse på Mandal bedehus, og Reidun hadde lova å ha med ei bløtkake klokka halv elleve. Ho bakte sukkerbrødet i går, det lukta godt i huset då. I dag var det pyntinga, og plutseleg var ho av garde.

-Eg er nok tilbake til tolv, sa ho, men klokka vart tre før ho om heim med det ho hadde vunne og det ho hadde kjøpt. I ettermiddag vart det sanneleg litt kake på meg også.

Eg trur ikkje det var på grunn av desse kakene at Norge slo Frankrike i handball i kveld, men om dei no vinn heile EM, bør dei vel få litt kake, dei også.

Det er ei travel tid med julemesser mange stader no framover. I morgon er det julemesse på Rysstad med Espen Ottosen frå Misjonssambandet som talar. Du kan lese meir om han på Setesdalswiki.

https://www.setesdalswiki.no/wiki/Espen_Ottosen

Låvevegg

Share

Om du kjører forbi oss her i Tregdevegen, har du sikkert sett at det ligg ein stabel med materialar utanfor låven vår. Tanken var at vi skulle bruke dei på å fikse låveveggen som du ikkje kan sjå. Den veggen er nokså glissen, så det var nok god tørk då det var høy i løa, for då kunne vinden blåse inn i sprekkene.

No er det lenge sidan det var høy i løa, så vi hadde planar om å gjere veggen tett. Naboen vår er snekker og har lova å gjere jobben, men han har hatt mykje å gjere, og vi har ikkje mast på han. Men i dag tok eg ein telefon til han, og då kom han innom. Over materiala ligg det ei presenning, men den vinden som har vore no, fekk tak i henne.

Over ein kaffekopp fortalde Christian Ihme at han hadde mykje å gjere, nedgangstidene dei snakkar om på TV hadde ikkje kome til han enno, folk byggjer framleis hytter i Åseral, så der er han annankvar veke. Men no ville han rydde plass og kome til oss over nyttår, han har to-tre mann i arbeid, så det burde ikkje ta så lang tid.

Så i 2023 er truleg også den veggen oppgradert.

Om Setesdalswiki og programma i Valle radio, som sender tysdag og onsdag kvar veke.